نحبّ نعرّس

مازالت تحب ترقد ناقصة ثلاث أيام نوم، البارح عدات ليلة كاملة على الأماسان و الفايسبوك، أما كيف العادة أمها تعدات للبيت و حلت الشباك: "قوم النهار راح.. عندك خدمة.. الفطور حاضر.. شكون يعاوني أنا في الدار.. ووه علي"، خرجت مالفرش بالسّيف، عملت طلّة على البورتابل، ما فمة حتى ميساج "والدين بوه.. ماعندوش صولد زعمة؟.. ولا بعثني"، قعدت تخمم هكة و هي تستنى في خوها يخرج مالبانو، دخلت تلقى الدنيا مزرزقة بالماء والشاس موش مجبود، سبّاتو مليح و كي العادة طفاها، وقفت قدام اللافابو و بدات تتفرج على وجهها، جيوب زرق تحت العينين، بوسة خال و حبّة طالعة جديدة، إستعوذت مالشيطان و بدات تفهم علاش الراجل طفّاها، حل عينيه على الروتانا و الأم سيس، "الزين" التونسي ماعادش يمالو عينيه، كملت التولات متاعها و بلحطت خليقتها باللي كتّب نيفيا و شيرلي و خلطت على بوها يخطف في الكرهبة و قاصد ربي، ركبت معاها و كي العادة ما قاللها حتى كلمة كان خزرات متاع وقتاش ترتاح و ترتحني، كلات بعضها بيناتهم خاطرها تعتبرو هو السبب في فسخ الخطوبة الإخرة و الوحيدة متاعها، حطها قدّام الخدمة و مشى، دخلت، العرف كي العادة يتضومر أما هالأيمات مسيبها و مكبش في سكريتيرة جديدة، زملائها كل واحد لاهي في نوارو، بعثت الشاوش على ديراكت و جريدة و كي العادة زادة حب يقلبها في 100 فرنك، عملت رشفة و طلة على حظك اليوم ـ مزفت كي العادة ـ و أكتيفات البروموسيون متاع الساعة بدينار، ما تحبش تطلب صاحباتها المعرسات خاطر فلقولها مررارتها بحكايات صغارهم و رجالهم







ـ ألو

ـ ألو، أهلا فلانة! عاش من سمع صوتك

ـ يعيشك، وينك يا طفلة؟ خدامة؟

ـ أيه، هاني قاعدة نفصص في الجلبانة، أمي شادة الفرش هالأيامات

ـ لاباس؟

ـ لا عادي تخلط عليها ماء و زيت، توة قلب و سكّر، ربي يستر

ـ نشالله لاباس، و بوك شنية أحوالو؟

ـ كي الجن الأرقط، كان تتوفى أمي ياخو أخرى غدوة

ـ ههههه، اللطف عليها، هو يعاود مرتين و أحنا نتفرجو

ـ شفت ماو، ما تفكرنيش، أنا الدار باش يهججوني في جرّة العرس

ـ أش صار جديد؟

ـ بنت خالي ولدت هالأيمات، كرهوني في روحي، نهار اللي أنا خذيت الباك هي تعرفت على راجلها في بواتة، لا عمرها شقات ولا تعبت

ـ سعود

ـ شفت ماو

ـ أنا تعرفت على زوز على الفايسبوك، فمة خيط

ـ صحة ليك، أنا نحاولي الأورديناتور مالبيت وحطوه في الصالة و العيون ديما فيها، أحكيلي؟

ـ فمة واحد تونسي، حليلتو على التصاور أما يظهر نهار و يغيب عشرة، قالي عندي أفاريات، أما ظاهر فيه يلعب بذيلو

ـ رد بالك منّو، الرجال التوانسة ما فيهمش أمان

ـ باش تقلي؟

ـ أيه، و الثاني؟

ـ الثاني فرنساوي، إسمو جون مارك و أكبر مني بعامين و عندو دار و كرهبة و

ـ وه وه وه؟ هذاكا حد نيتك؟

ـ شنية المشكلة؟ موش خوك حرق هكة العام اللي فات مع عزوزة؟ و كانك على الدين قالي يطّهّر ما يقلقوش

1 commentaires:

AYOUBSAHBENI a dit…

عتيك الصحة في هالموضوع الهايل هههههههه

Enregistrer un commentaire

عبر خاطر موش ديما تنجم تعبر، أما ما تخليش روحك أخر مرة تنجم تعبر